Enseñansa pa Empleo ta gradici Bureau di Minister Glenbert Croes pa e sosten y apoyo.

Despues dos aña di dificultad pa por ofrece cursonan na pueblo, manera EPE semper tabata conoci p’e den nos comunidad, Diamars ultimo, 1 di maart 2022, nos di EpE ta hopi orguyoso pa por habri e portanan di EpE bek na un forma cu ta accesibel pa tur hende por yega pa keda desaroya su mes manteniendo tarifanan socialisa.

Nos di EpE kier gradici Minister Glenbert Croes y henter team di Aruba Kier Traha y Bureau pa nan cooperacion. Sin e yudansa y sosten di Minister Glenbert Croes nunca nos lo a logra pa habri nos portanan bek asina liher pa esunnan interesa di sigui empodera nan mes mediante e diferente cursonan cu EPE ta ofrece.

En vista cu nos no tin internet ni telefon ainda, un team di Aruba Kier Traha y Bureau di Minister di Labor, Energia & Integracion a duna apoyo na nos di EpE den gran forma. Nos cursistanan cu a logra haya cupo a wordo yama y diamars ultimo e team di IT a instala programanan riba nos computernan.

Esey no tabata facil mirando cu ainda nos no tin internet. Pero e team dinamico a tuma a iniciativa di instala e programanan necesario na Bestuurskantoor pa sigura cu nos cursistanan y pueblo en general lo tin un manera optimal pa inicia cu e diverso cursonan di computerskills cu a inicia 2 di maart ultimo. Actualmente EPE ta ofreciendo curso di Computer pa beginners y tambe programanan mas specifico manera Excel y Quickbooks.

Nos ta gradici henter comunidad pa e miles di registracion cu EPE a ricibi di interesadonan cu kier sigui desoraya nan mes. Aunke ainda nos no por a duna tur hende cupo den e prome tanda, pronto lo anuncia e di dos periodo pa sigui curso. Esun cu pa e biaha aki no a haya cupo, lo wordo invita pa inscribi y participa prome.

 

Un biaha mas nos ta gradici Minister Croes, team na bureau y di Aruba Kier Traha y henter comunidad pa semper ta para tras di EpE, duna nos sosten y apoyo pa sigui brinda mas curso posibel.

 

Pa mas informacion tocante Enseñansa pa Empleo por yama libremente na bureau di Minister na telefon 528.4963 te ora cu logra keda cla cu instalacion telefonico na EPE cu ta pendiente di SETAR pa e trabou cu mester wordo haci. Tambe por sigui nos riba nos pagina di Facebook: Enseñansa pa Empleo.

 

3 maart 2022

2022-03-07T11:18:33-04:00