PRONTO LO ANUNCIA RE-APERTURA DI ENSEÑANSA PA EMPLEO

ORANJESTAD-Dialuna mainta durante tratamento di presupuesto 2023, Minister Glenbert Croes a elabora riba e renobacion tumando lugar na Eseñansa pa Empleo (EPE).

Manera ta conoci EPE a wordo funda na aña 1988 pa yuda tur esnan cu a perde trabou tempo cu Lago a cera su portanan na aña 1985. Mirando e necesidad den comunidad pa trabou e tempo ey, gobierno a bin cu e proyecto pa ‘her- en bijscholing’ di e hendenan cu no tabatin trabou. Asina EPE a wordo funda pa ofrece esnan den necesidad, cursonan pa un ofishi nobo, entre otro den custruccion y den e industria hotelero. Actualmente Enseñansa pa Empleo ta ofrece un variedad di curso riba diferente nivel pa crea oportunidad pa nos comunidad den e mercado laboral.

Lamentablemente EPE bou di e Minister anterior tabata poni pa desaparece. Mirando e importancia di EPE pa e mercado laboral, Gabinete Wever-Croes II a tuma e decision pa inverti den renoba e departamento aki. Minister Croes ta spera cu pa final di luna e lo por invita tur miembro di Parlamento incluyendo oposicion pa bishita y asina admira e EPE nobo. Apesar cu trabounan ta andando, luna pasa cu apoyo di Aruba Marriott Resort and Stellaris Casino a instala un salon na unda ta duna les na esnan interesa den e trabou di casino dealer. Por a nota cu e interes pa traha den e dicho ofishi ta uno grandi.

Minister Glenbert Croes ta sumamente contento cu e trabounan haci y ta en espera di por anuncia pronto e gran reapertura di e EPE nobo, pa henter nos comunidad, nos hendenan, nos yiunan di tera y tur nos trahadornan por probecha di e cursonan cu ta wordo ofreci.

Pa mas informacion di cursonan bishita  www.epearuba.com

Inscripcion curso E.P.E

Escoge cual curso bo ta desea di sigui. (Si no tin lugar pa e prome curso, E.P.E lo purba haya cupo pa bo segundo opcion di curso)
Danki pa bo inscripcion. Unabes bo persona wordo notifica pa medio di e-mail cu tin cupo pa e curso di bo escogencia, tuma e siguiente pasonan:

1. Paga inscripcion pa e suma di AWG 50. Si ta hasi pago via transfer nota nomber, fam completo di cursista y nomber di e curso.
2. Hasi pago completo of sera un areglo di pago pa e curso (maximo den 2 pago). Si ta hasi pago via transfer nota nomber, fam completo di cursista y nomber di e curso.
3. Upload of entrega papel di Censo di AWG 5,-

Cada curso mester tin minimo 15 cursita inscribi pa por continua. Si no tin suficiente inscripcion e curso lo wordo cancela. Si pa un of otro motibo bo persona dicidi di no bin curso mas E.P.E no ta debolbe suma di inscripcion tampoco no ta debolbe suma di curso. E.P.E ta acepta solamente pago via transfer of por paga na E.P.E via ATM/POS machine.